BACOLOD CITY – Ginahibalo pa sa karun sang Department of Environment and Natural Resources (DENR) kun sin-o ang naghaboy sang sinako nga patay nga pangolins ukon anteaters kag nagapanimaho na sa reclamation area sang Bacolod.
Sa exclusive interview sang Bombo Radyo sa isa ka residente sa lugar nga si Milagros Sadaya, ang iya bata nga nagatipon sang scrap ang nakakita sa frozen nga sapat kahapon sang hapon kag gindala niya ini sa ila balay sa pagdumdom nga isa ini ka baboy.
Iya naman gindumdom nga isa ini ka fetus gani gin-usisa ang lawas sini kag nakit-an nga wala na ini sang kasudlan kag wala naman sang dugo.
Suno kay DENR NIR director Al Orolfo, nangin transit na sang mga nagadala sang pangolins ang ciudad sang Bacolod kaangay sang nadakpan sang nagligad sa pier sang Manila nga nadiskubre nga halin ang mga ini sa Palawan.
Bangud sini, ang mga pangolins suno sa iya ang ipadala sa Biodiversity Management Bureau sang DENR agud ipaidalom sa DNA test kag mahibaluan kun halin ini sa Palawan ukon sa Malaysia.
Nahibaluan nga madali nalang mangin endangered species ang balintong nga endemic sa Palawan kag ginapatay sang iban agud himuon nga bulong apang ini ang iligal amo gani nga magapangatubang sa kaso ang nagtransport sini.
