May duha na ka persons of interest ang Sipalay City Police Station sa nagluthang sa 69 anyos nga mangingisda sa Purok 4, Brgy. 2, Sipalay City sang Biyernes sang gab-i.
Ang biktima ang ginkilala lamang nga si Alyas Remigio.
Sa interview sang Bombo Radyo kay PLt Cipriano Lumanog, Deputy Chief of Police for Operations sang Sipalay City Police Station, ang biktima ang yara sa sulod sang iya balay kag nagahulat nga magsiga ang suga bangod brownout sang hinali nga nagsulod ang suspect.
Ginalantaw nga ginhingalitan sang suspect ang kadulom kag hinali nga ginluthang ang biktima sang makapila ka beses.
Gindala pa sa Sipalay infirmary health center ang biktima apang ini ang wala na matabangan.
Wala naman makilala ang suspect kag wala man matumod kun ano ang kalibre sang armas nga gingamit sa krimen.
Suno kay Lumanog duha ang ginalantaw nga suspek kun sa diin isa ang nagluthang samtang ang isa naman ang look-out.
