Focus sa karun sang Sipalay City Social Welfare and Development Office nga mapasaka ang kaso batok sa amay nga gina-alegar naghimulos sa lima sini ka kabataan sa Barangay Nabulao, Sipalay City.
Nahibaluan nga nagdangop sa Barangay Hall sang Barangay Nabulao ang 25 kag 27 anyos nga mag-utod matapos mahibaluan nga sa pito ka mag-ulutod nga ginalakipan sang isa ka lalaki kag anom ka babayi, lima sa mga babayi nga kabataan ang ginahimuslan sini humalin palang sang 12 anyos.
Ini ang ginapadayun pa sang amay apisar nga may mga kaugalingon na nga pamilya ang mga kabataan.
Ang isyu ang nabuyagyag matapos nga magluntad ang komosyon sa pamilya.
Nahibaluan nga ginasugo sang amay ang mga kabataan nga maggwa kaangay sa paglawig sang karbaw, pagpangahoy kag iban pa, apang sa tion nga malayo na sa balay, didto na sini ginahimo ang sexual harrasment.
Naga-aman man ini sang binangon sa iya tupad, nga ginagamit sini nga pamahog, nga sila ang pamatyon sa tion nga manugid.
Ini ang nasugid man sang mga kabataan sa ila iloy, apang tubtob sa karun, ang iloy ang wala nagapati sa alegasyon.
Sa interview sang Bombo Radyo Bacolod kay Sipalay City Social Welfare and Development Office Head Ivy Lynn Gallenero, ipaidalum nila sa psychosocial therapy ang mga biktima, apang unahon anay nila ang pagseguro nga madagdagan sang kaso ang amay agud makaangkon man sang peace of mind ang mga biktima.
Suno diri, 18 tanan ang yara sa Women and Children Crisis Center bangod may-ara naman sang tagsa ka pamilya ang mga kabataan kalakip na ang bugtong nga lalaki.
Sa pihak sini, may pila pa sila ka mga utod nga nagpalayo na sa luyo sang ila ginikanan matapos nga makapamana.
Suno kay Gallenero, sila ang magakoordinar man sa Hinobaan Municipal Social Welfare and Development Office, bangod sa nasambitan nga banwa nakarehistro ang mga biktima, apisar nga ang ila balay ang nahamtang sa ciudad sang Sipalay.
Ini agud madiskusyunan ang sarang nga mabulig sa mga biktima.
