Magasugod na subong nga bulan sang Enero ang site development kag construction sang Cell No. 5 sa sanitary landfill sa Brgy Felisa, Bacolod City nga magalawig tubtob sa anum ka bulan.
Sa interview sang Bombo Radyo kay Bacolod City Mayor Greg Gasataya, estable na ang sitwasyon sang sanitary landfill apisar nga daku ang volume sang basura nga ginakolekta kada semana sang International Solid Waste Integrated Management Specialists Inc. (ISWIM), partikular na halin sang Enero 1 tubtob sa sa karun.
Suno sa alkalde, ang construction sang Cell No. 5 ang magalawig sang anum ka bulan base sa kontrata.
Nahibaluan nga napuno na sang ciudad ang Cell No. 1 tubtob 3 kag ang Cell No. 4 sa karon ang ginalauman nga magalawig nalang sang duha tubtob apat ka bulan.
Sa solid waste management, aminado si Mayor Greg nga daku nga pagtilaw ang bahin sang waste segregation.
