Ginpakigbahin sang nagaisahanon nga graduate gikan sa Casipungan Elementary School sa Barangay Carabalan, Himamaylan City nga natalana na nga makagradwar sa kolehiyo ang nangin mabudlay sini nga journey sa iya nga pag-eskwela.
Ang mga kabataan nga naga-gradwar gikan sa Casipungan Elementary School ang nahibaluan nga masami wala na nagapadayun sa High School bangod sa tuman ka layo nga lugar.
Si Mario Poldadero, 24 anyos, residente sa Sitio Florete, Barangay Carabalan, Himamaylan City ang 4th year college na sa karun sa Carlos Hilado Memorial State University – Binalbagan sa kurso nga Bachelor of Science in Elementary Education.
Si Mario lamang gikan sa 10 nga mag-ulutod ang nakatapak sa Highschool samtang siya man ang naga-isahanon nga naggradwar sa Casipungan Elementary School nga nakatapak sa kolehiyo.
Ginpakigbahin sini nga 30 minutos kun pagalakton ang ila puluy-an padulong sa buluthuan sang Elementary kag magluwas sa nabukid ang lugar may mga suba pa nga pagalabayan.
Indi man nangin mahapos ang pag-eskwela sini sa elementarya bangod sa masami kararuton kaangay sa balinghoy lamang ang iya nga ginabalon.
Ang sitwasyon sang ila pamilya kag kabudlayan sang iya nga mga ginikanan nga lunsay mga mangunguma ang nagmotibar sa iya nga tapuson ang pagtuon.
Napabatud-an man sini nga indi upang ang kapigaduhon sa paglab-ot sa handum nga amo man masami ang ginahambal sa iya sang mga manunudlo.
Apat ka kilometros naman ang kalayuon sang eskwelahan sini sa High School nga nagadangat sa tatlo ka oras nga paglakat.
Bangod sini alas-3:00 sang aga palang, nagalakat na ini samtang nagadangat naman sa alas-7:00 ukon alas-8:00 sang gab-i ini antes makapauli.
Kun kaisa, wala man ini nakahibalo nga may bagyo gani nagapadulong sa eskwelahan kag didto nalang nagakahibaluan nga wala sang klase bangod wala man nagadangat sa ila lugar ang impormasyon.
Dyutayan pa ini nga pauntaton sang iloy sa High School sang nahibaluan nga may balayran sa eskwelahan, apang ini ang nanindugan nga magatrabaho sa kampo agud nga may inug-bayad.
Agud nga maka-eskwela sa kolehiyo, si Mario ang nagdesidar nga magworking student kun sa diin siya ang nagatudlo sa mga kabataan sa bahin sang espiritwal nga mga pagkabutang kag siya ang nagabatun man sang P5,000 kada bulan nga ginagamit sini sa kolehiyo.
Aminado man ini nga bisan pa luyag niya nga makasulod sa rankings, apang bangod sa trabaho nagaka-apektuhan man ang iya nga pagtuon.
Apisar sa kabudlayan ginatinguhaan sini nga indi madulaan sang paglaom bangod madulaan sang kapuslanan ang iya nangin pagpaninguha.
Apisar sa na-eskperyensya nga kabudlayan, dako man ang pagpasalamat sini sa ginikanan bangod sa pagsuporta sa iya.
Samtang mangin surpresa naman kuntani sini sa iloy ang paggradwar sa masunod nga tuig bangod wala ini sang ihibalo nga siya ang graduating na.
Bukas naman si Mario kag mangin malipayon kun siya nga makatudlo sa iya nga Alma Matter sa tion nga mangin lesinsyado na nga manunudlo
Samtang emosyonal naman nga ginpakigbahin ni Nora Poldadero, iloy ni Mario ang kabudlayan nga gin-agyan sang ila nga pamilya.
Suno pa diri wala siya sang ihibalo nga magagradwar na ang iya nga bata bangod tubtob sa High School lamang ang iya nahibaluan.
Sadto ginahambalan nalang sini si Mario nga indi nalang mag-eskwela bangod naluoy ini nga wala sang balon apang nagapanindugan ang bata.
Bangod sini nagasuporta nalang kalakip na ang mga utod sini sa pagbakal sang mga ballpen kag papel.
May mga kahigayunan man nga wala na ini sang mapakaon sa pamilya kag halos mag ampo na.
Ginakalipay man sini nga nagworking student ang bata sang magtungtong sa kolehiyo gani ini ang wala na sang problema sa pagkaon samtang ginatsekyar man sang mga manunudlo sa Casipungan Elementary School kun ini ang may ginakaon pa.
Dako ang pagpasalamay sang iloy sa Ginoo, mga manunudlo kag sa iban pa nga nagbulig sa iya nga bata tubtob sa karun nga ini ang manug-graduate na sa kolehiyo.
