Nagpatigayon na ang Local Goverment Unit sang Himamaylan City sang tikang agud nga mahatagan sang gilayon nga solusyon ang problema sang kakulang sang mainum nga tubig sa pila ka mga barangay sa ciuda bangud sa epekto sang tuman kainit nga panahon.
Sa interview sang Bombo Radyo Bacolod kay Joefil Sombilon, pinuno sang City Disaster Risk Reduction Management Office sang Himamaylan City, sa pinakaulihi nga data siyam ka barangay sa ciudad ang ginakulang sa ilimnon nga tubig bangud naghubas ang mga bomba kag bubon nga ginakuhaan sang mga ini, bangud sa tuman nga kainiton.
Gani nagbutang ang ciudad sang hose sang tubig kag ginconnect sa makuhaan sang supply sang tubig agud nga may gamiton ang mga residente.
Suno kay Sombilon, nagdugang ang gasto sang mga panimalay nga apektado bangud nagabakal sila sang tubig nga ginainum kasubong man ginagamit magpanghugas.
Ginpahayag man sini nga nag-abot naman ang water filtration nga ginhulam nila gikan sa probinsya kag mahimo na ini nga magamit agud nga mahatagan sang mainum nga tubig ang mga residente kag indi na magbakal.
Ang water district ang wala man sang reported nga ginakulang sa tubig.
Suno diri, nagnubo gid ang water level sa ciudad apang ang nasambit nga problema ang naeksperyensyahan pa sa ciudad sang 2019.
Samtang 11 naman ka agricultural barangays ang apektado sang tuman ka init nga panahon.
