Ginalauman nga may yara sang patigayonon nga special pay out sa masunod nga semana para sa mga tricycle drivers sa bug-os nga Negros Island Region nga wala pa nakakuha sang fuel subsidy.
Sa interview sang Bombo Radyo Bacolod kay Department of Social Welfare and Development (DSWD) Director Arwin Razo, kahapon nagdangat na sa 88 percent ang ila nahatagan sang ayuda kag ang 12 percent nga nabilin ginalauman nga mahatagan subong nga adlaw para makaclaim sang subsidy.
Suno diri, kapin sa P73.4 million na ang ila napanagtag sa masobra 14,600 ka mga tricycle drivers sa 43 ka Local Government Units sa rehiyon.
May ginhatag na nga derektiba nga kun mahimo magpatigayon sang door to door pay out apang kun indi pa gid matapos, mahimo nga may italana nga adlaw sa masunod nga semana para sa special pay out.
Suno kay Razo may yara sang nagareklamo nga wala nadala sa listahan, amo nga ginpangabay sini sa mga LGUs nga hibalo-on ang rason kun ngaa wala nadala sa lista ang driver bangod indi sini luyag nga may yara sang mabilin nga driver nga indi makabaton.
Pahayag sini, sa masobra 18,000 nga nagpasa sang requirements, kapin sa 17,000 lamang ang yara sa lista kun sa diin iban ginkakas na bangod nakakuha na sila sang tinalikdan.
Dugang pa sini, may yara lamang sang isa ka LGU sa Negros Oriental nga wala nakacomply sa requirements amo nga wala nahatagan sang subsidy ang mga drivers sang banwa.
Samtang, ginkalipay man sini ang mga pahayag sang mga drivers nga dako na nga bulig para sa ila ang P5,000 fuel subsidy ilabi na sa karun nga krisis kun sa diin mas ginakinahanglan nila ang assistance sang national government.
