Ginapahanumdom sang Department of Education Region 6 nga dapat mapakita ang espirito sang paskwa ukon ang pagshare sa nagakinahanglan, sa pagpatigayon sang Christmas Party.
Sa interview sang Bombo Radyo Bacolod kay Hernani Escullar Jr., public information officer sang DepEd Region 6, santo sa official school calendar, ang christmas party ang masami nga ginapatigayon sa ulihi nga semana antes ang School break.
Ang Christmas break ang magasugod sa Disyembre 21, gani ang chrismas party ang sarang patigayunon Disyembre 16 tubtob 20.
Magabalik naman ang estudyante sa Enero 2, 2025.
Ginapahanumdom man ang pagpatigayon sang simple ukon indi garboso nga christmas party bisan sa mga estudyante.
Ginadumilian man ang paghiwat sang selebrasyon sa gwa sang school campus.
Pahanumdom ni Escullar nga ang paskwa ang tion sa pagshare sang blessings, gani ginapanugyan gid sini sa mga ginikanan nga imol kag wala sang ikasarang sa pag-amot ukon paghatag sang regalo nga patambungon gihapon ang ila mga kabataan.
Panugyan sini sa mga medyo may ikasarang nga magshare sa mga estudyante nga pigado.
Ginadumilian man ang mandatory collections kag dapat boluntaryo lamang ang donasyon.
Apang ang mga school personnel ang ginadumilian man sa pagsolicit in cash man ukon in kind.
