Ginpahayag sang Sports Coordinator sang Negros Occidental nga maayo ang kahimtangan sang delegates sang Negros Occidental nga nagpadulong sa probinsya sang Antique agud nga maghampang sa 2025 Western Visayas Regional Athletic Association (WVRAA) Meet.
Sa interview sang Bombo Radyo Bacolod kay Romeo Sison, maayo man ang ila nga sitwasyon sa Antique kag maayo man ang pagtatap sang Local Government Unit sa ila.
Suno kay Sison, ginakalipay sini nga maayo man ang mga performance sang mga atleta sa ila mga ginahampangan nga sports discipline.
Suno diri, bangud sa distansya sang mga playing venue gikan sa ila nga belitting areas, ang mga atleta na mismo ang nagaadjust sang ila oras agud nga makaabot sa insakto nga oras sang ila nga hampang.
May schedule na para sa tanan nga hinampang apang suspendido ang outdoor games alas-10:00 sang aga tubtob alas-3:00 sang udto bangod sa tuman ka init.
Wala naman sang dako nga problema sa billeting area bangod tupaday ang mga eskwelahan nga ginatiniran sang tanan nga delegates.
Apang, may yara lang sang kakulangan sang tubig apang yara ang Bureau of Fire Protection (BFP) kada adlaw para maghatag sang dugang nga water supply.
Ginalauman naman sini sa karun nga matuman ang mensahe ni Negros Occidental Governor Eugenio Jose ‘Bong’ Lacson nga antes magsaylo sa Negros Island Region ang probinsya sa masunod na tuig, makabilin anay ang Negros Occidental sang history bilang nagapanguna nga probinsya sa 2025 Western Visayas Regional Athletic Association.
Boosted naman ang morale sang mga atleta bangud mismo ang gobernador ang nagtambong gid sa opening sang WVRAA Meet sang Domingo.
Santo sa 2025 Western Visayas Regional Athletic Association Meet (WVRAA) Medal Tally as of March 3, 2025 – 5:15 p.m., sa Elementary ang Negros Occidental ang may yara sang 12 gold; 7 Silver kag 5 bronze.
Sa Secondary may yara 12 gold; 7 silver kag 5 bronze kag sa Para Games may yara sang tatlo ka Gold; lima ka silver; kag isa ka bronze.
