Nalipay ang mga opisyal sang College of Health and Allied Sciences sang State University of Northern Negros nga sila ang top performing school sa November 2026 Midwives Licensure Examination kun sa diin 49 nagikan sa 52 ka examinees ang nakapasar ukon katumbas sang 94.23 percent.
Sa interview sang Bombo Radyo kay Aileen Sypongco, dean sang College of Health and Allied Sciences, ini nga distinction sa board exam ang ultimate goal sang isa ka eskwelahan gani ila ini nga ginakalipay.
Suno kay Sypongco, nagikan sa low-income families ang mga estudyante sa SUNN apang wala nangin upang ang kaimulon agud nga makatapos sa pag-eskwela ang mga estudyante.
Ginascreen suno sa iya ang mga estudyante halin sa admission test kag may istrikto nga retention policy ang SUNN bangud ginasiguro nga maayo ang kalidad sang edukasyon bisan yara sila sa rural area.
Ginpasalamatan man sini ang KASAMA Program sang local government kun sa diin may financial assistance ang mga estudyante para sa pagkuha sang board exam tubtub sa pag-take oath.
Halin sa panugod, na-incorporate man sa ila nga curriculum ang isa ka programa para sa competency appraisal bilang preparasyon sa board exam agud handa na sila bisan indi na magreview pagkatapos sang graduation. Samtang, aminado ang pinuno sang BS Midwifery Program sang State University of Northern Negros nga wala nila ginapaabot nga mangin top performing school sa November 2026 Midwives Licensure Examination.
Sa interview sang Bombo Radyo kay Jona Marie Paez, ginpangamuyo niya nga makapasar ang tanan nga takers kag makaproduce sang Top 10 apang wala niya gin-expect nga mangin top performing school ang SUNN.
May mga tinuig nga nangin 6th placer kag 7th placer ang SUNN sa top performing schools gani nagapaabot sila nga amo man gihapon sini ang ila nga pwesto subong nga tuig.
Yara sila sa faculty room sang naggwa ang resulta gani nakalumpat sila sa kalipay sang nakita ang ngalan sang eskwelahan bilang top performing school.
Suno kay Paez, ginamentor nila ang mga estudyante sang challenges nga ila maagyan kag ginatudluan nga batunon kag lampuwasan ang challenge.
Suno naman kay Natasha Kay Chan, head sang Bs Nursing and Clinical Coordinator Program sang SUNN, sa idalom sang kasuguan, kinahanglan sang estudyante nga makapabata sang 20 ka babayi nga sila mismo ang naghandle sang delivery antes makagraduate kag makakuha sang board exam.
Kun sa northern negros lang suno sa iya, mabudlayan ang estudyante nga kumpletuhon ini sa sulod sang duha ka tuig gani nakalab-ot sila sa Kabankalan kag Ilog.
Gin-assign ni Chan ang mga estudyante sa nagkalain-lain nga lying-in facilities kada semana halin sa northern padulong sa southern Negros agud nga mafulfill ang ini nga requirement.
Kampante naman si Chan nga mangin maayo nga midwife ang ila graduates bangud manami ang ila nga clinical preparation.
