Pormal na nga ginbinuksan ni Pangulong Ferdinand Marcos Jr. ang 49th ASEAN Summit and Related Summits sa Philippine International Convention Center (PICC), Pasay City, Domingo, Nobyembre 15, 2026.
Sa iya nga speech, ginhatagan pagtamod ni Marcos ang paghugpong kag pagbinuligay sang onse ka pungsod nga miyembro sang ASEAN sa pag-atubang sa mga pagpanghangkat sa seguridad, ekonomiya kag climate change.
Kalakip sa mga prayoridad sang ASEAN ang kalinong, pag-uswa sang ekonomiya kag welfare sang mga pumuluyo sa idalom sang tema nga tema nga “Navigating Our Future, together.”
Sa pihak nga bahin, gin-estoryahan nanday Presidente Ferdinand Marcos Jr. kag Brazilian President Luiz Inácio Lula da Silva ang pagpabaskog sang kooperasyon sang Pilipinas kag Brazil sa sektor sang agrikultura agod maproteheran ang mga lokal nga nga talamnan, mapasanyog ang produksyon sang mga livestock kag masiguro ang seguridad sa pagkaon.
Suno sa Presidential Communications Office (PCO), nalakip ini sa mga naistoryahan sang duha ka mga lider sa ila pagsinapol sa Pilipinas angut sa ika-49 nga ASEAN Summit.
Nagpirma ang Pilipinas kag Brazil sa isa ka memorandum of agreement nga magahatag sang ligwa sa pagbayluhanay sang ihibalo, teknikal nga training kag iban pa nga programa para sa mga nagatrabaho sa agrikultura, beterinaryo kag iban pa nga sektor nga may kaangtanan sa pagbantay sa mga balatian sang sapat kag farm management.
Suno kay Marcos, luyag sang Pilipinas nga himuon nga oportunidad ang nagapadayon nga negosasyon sang duha ka mga pungsod agod mas mapadalom ang ila kooperasyon sa agrikultura.
