Ginpahayag sang La Carlota City Police Station nga padayon ang imbestigasyon sa pagpatay kay Pearl Joy Galve samtang indi pa klaro ang mga statement sang iloy kag stepfather sini.
Sa interview sang Bombo Radyo Bacolod kay Police Lt. Col. Lymel John Pasquin, hepe sang La Carlota City Police Station, padayon pa nga gina-assess kag gina-reevaluate ang statement ni Jennifer Galve kag Rene John Nasis bangod nga magluwas nga limitado ang impormasyon gikan sa duha, may inconsistency pa sa mga ini.
Suno diri, ginahibalo pa kun ano ang insakto kag matuod sa statement sang duha.
Ini kasunod man sa pahayag ni Nasis nga kun siya may yara gid man sang luyag nga patyon, ini ang indi sa pamilya ni Pearl Joy kundi ang gina-alegar third party sang iya asawa.
Samtang, gina-evaluate man sa karun kun ano ang epekto sang pagkadiskubre sang nakasachet nga mga puti nga powder nga una nga ginpatihan nga shabu apang negatibo ang resulta sa Negros Occidental Crime Laboratory Unit.
Sa karun, padayon sa gihapon ang imbestigasyon agud mahatagan sang hustisya ang pagkapatay sang 15 anyos nga si Pearl Joy.
