Mas ginhugtan pa sang STI-West Negros University ang ila security measures agud maseguro ang safety sang mga kabataan, manunudlo, kag school staff.
Ini kasunod sang nagluntad nga school shooting sa Ateneo de Zamboanga University kun sa diin lima ang ginbawian sang kabuhi, samtang walo naman ang pilason.
Kalakip sa napatay ang gunman nga si Nael Jalani, Grade 9 Junior High School student, nga highest honor sa ila nga klase nga nag-utas sang kabuhi matapos sang krimen.
Napatay man sini ang iya classmate nga bata sang alkalde, kag duha ka security guard, samtang ang ila manunudlo nga miyembro sang LGBTQ+ community nga una sini nga ginbiktima ang gindala pa sa ospital apang sa ulihi, ginbawian man sang kabuhi.
Sa interview sang Bombo Radyo Bacolod kay Beau Villanueva, director sang Administration Services sang STI-West Negros University, ginaseryoso gid sang ila unibersidad ang seguridad sa school campus gani sila ang nagapatuman sang access control measures.
Antes paman ang pagduging sang mga insidente sang school violence, ang eskwelahan ang nagapatuman na sang security measures, apang ini ang ginpahugtan pa.
Luwas diri, aktibo man ang CCTV monitoring, kag ginpaidalom gid sa training ang mga security personnel kun paano magreact sa kaangay nga mga pagpamahog.
May walk through kag hand held metal detector man nga ginagamit sa pagsulod sang mga estudyante, school staff, kag mga bisita.
Isa sa nangin kabudlayan amo ang mga private vehicle nga nagadul-ong sang estudyante kag nagapasulod sang salakyan sa school campus, gani ang mga ini ang indi makalabay sa entrance para sa checking.
Samtang ang mga estudyante ang may ginapanumpaan man sa kada flag ceremony, nga nagapahanumdom batok sa bullying, kag kun paano dapat trataor ang iban nga tawo. Samtang, ginpahayag sang konsehal sa ciudad sang Bacolod nga importante gid ang security measures sa kada eskwelahan.
Ini kasunod sang school shooting sa Ateneo de Zamboanga University kun sa diin ginluthang-patay sang Grade 9 student nga si Nael Jalani, bata sang Customs police chief sa Zamboanga, ang ila manunudlo, iban pa nga mga estudyante kag mga security guards.
Ang shooting incident ang nagresulta sa pagkamatay sang isa ka estudyante kag duha ka security guard, samtang nag-utas man sang kaugalingon nga kabuhi si Jalani.
Sa interview sang Bombo Radyo Bacolod kay Bacolod City Councilor Thadeus “Thaddy” Sayson, mahimo nga may-ara sang lapses sa security measure sang eskwelahan.
Ini matapos mapasulod ni Jalani sa school campus ang isa ka Glock 9mm handgun kag ang custom built nga M16 rifle.
Bangod sa panibag-o nga insidente, ginapanawagan ni Sayson sa mga eskwelahan sa Bacolod City, pampubliko man ukon pribado, nga estriktuhon pa ang mga security measures.
Pahanumdom niya nga indi gid dapat tugutan nga may makasulod nga armas-luthang, kutsilyo, kag iban pa nga peligroso nga butang sa eskwelahan.
Nagalaom si Sayson nga ang hitabo ang magaserbe nga leksyon ukon pahanumdom sa iban pa nga eskwelahan.
Ginlaragway ni Sayson ang mga nagakatabo nga school violence bilang copycat sa mga nagakatabo sa America.
