Patigayunon subong nga Huwebes ang flushing ukon pagpapuswit sang tubig sa Masa Mart sang Central Market sa Dalan Bonifacio matapos nga ginpangguba na ang mga balaligyaan nga nahamtang sa lugar.
Sa interview sang Bombo Radyo kay Executive Assistant to the Mayor Ernie Pineda, patigayunon ang flushing sa bulig sang Bureau of Fire Protection kag sang Department of Public Services agud malimpyuhan ang dalan.
Suno kay Pineda, ang mga vendors nga nagbiya sa Masa Mart ang sayluhon sa Vendors Plaza.
Apang antes ang ila pagsaylo, dapat nga magapabutyag ang mga ini nga luyag nila nga magsaylo.
Nahibaluan nga gindemolish ang mga pwesto sa Masa Mart matapos gin-repeal ang ordinansa sang tuig 1980 nga nagapahanugot sang ila pagbaligya diri, bilang pagsunod sa memorandum circular sang Department of the Interior and Local Government nga hawanan ang mga obstruction sa dalan.
Suno naman sa nagabaligya sang prutas nga si Bebing Doromal, nagasunod sila sa mandu sang gobyerno apang nagalaom ini nga kuntani maayo lang ang ila sayluhan.
Suno kay Doromal, nagahingyo sila kay Mayor Evelio Leonardia nga kuntani tamdon man niya ang mga vendors paagi sa paghatag sang maayo nga pwesto.
Suno diri, dinekada na ang pagbaligya niya sang prutas sa Central Market.
Nagalaom ang tagpamaba sang Bacolod City Public Market Kiosks and Stalls Occupants nga tumanon sang city government ang ila promisa nga hatagan sila sang permanente nga pwesto.
Sa interview sang Bombo Radyo Bacolod kay Mr. Rodolfo Maligmat Jr., ginpahayag sini nga maka-alokar kuntani sang pondo ang ciudad agud mapatindugan sila sang “world class” nga merkado.
Suno kay Maligmat, ginahangkat nila ang Leonardia administration nga mahatagan sila sang permanente nga salayluhan.
Sa karon, temporaryo nga magatinir ang mga ini sa Vendors Plaza.
Suno sa tagpamaba, nag-draw lots na kahapon ang kapin 90 ka mga vendors para sa kiosko nga ila pagahamtangan sa Vendors Plaza.
Nagapngabay naman si Maligmat sa mga bumalakal nga suportahan ang mga vendors sa Vendors Plaza.
Samtang, ginakasubo naman sang isa sa mga vendors sa Masa Mart nga ginkakas ang ila pwesto apang ginhimo man lang nga parkingan ang gin-abandonar nila nga lugar.
Suno kay Kimberly Ortega nga isa ka fruit vendor, 45 ka tuig na nga nagabaligya ang ila pamilya sa Masa Mart kun sa diin may yara sila sang lima ka stalls.
Dugang pa ni Ortega, nagakalisod gid sila nga magpamilya bangud magluwas nga ginkakas ang ila palangabuhian, indi man mahapos para sa ila nga magbiya sa lugar nga ila gindakuan.
Subong nga adlaw, patigayunon ang flushing ukon pagpapuswit sang tubig sa Masa Mart matapos nga ginpangguba na ang mga balaligyaan nga nahamtang sa lugar.
