Narecover ang masobra P4.5 million nga balor sang suspected shabu sa sub-leader sang Kaunda Gang sa drug buybust operation nga ginpatigayon sa Purok Nami-Nami 1, Barangay Sum-Ag, Bacolod City alas-5:41 kaina sang aga.
Sa pagpanguna sang City Drug Enforcement Unit sang Bacolod City Police Office, madinalag-on nga naaresto si Faisal Sacar, 24 anyos, single, wala sang trabaho, kag residente sa Islamic Compound, Brgy 31, Bacolod City.
Sa interview sang Bombo Radyo Bacolod kay CDEU Head Police Lt Col Antonio Benetiz Jr., ang subject ang nakilala man nga sub-leader sang Kaunda Gang, ang criminal gang nga imbulbado sa illegal drug trade sa Bacolod City kag Negros Occidental.
Narecover sa paghinakop sang suspect ang siyam ka nakabugkos nga plastic bag kag lima ka sachet sang suspected shabu kalakip ang buybust item.
Ang supected shabu ang ginabanta nagabug-at sang 675 gram kag may standard drug price nga P4,590,000.
Si Sacar ang may duha ka standing warrant bangod man sa pagbaligya kag paghupot sang illegal nga droga kag kalakip sa Most Wanted Person sa Bacolod City.
