Tuman ang kasubo sang subang nga bata matapos ginlabo sang iya amay ang ila iloy kag apat ka mga manghod.
Sa interview sang Bombo Radyo Bacolod kay Harold Francisco, 19 anyos, kargador sang paya, kahapon lamang ini nagpauli agud magdul-ong sang allowance kag bulong sang ila amay.
Suno diri, siya kag ang 16 anyos niya nga utod nga babayi nga yara sa Manila lamang ang bread winner sa ila pamilya sumugod sang nagsuprer sang nervous breakdown ang ila amay.
Madumduman nga ginlabo sang amay ang live-in partner sini kag ang isa, tatlo, anom kag siyam ka tuig nga mga kabataan, samtang ang 13 anyos naman nga bata ang nakakita sa pag-utas sang kabuhi sang amay.
Pahayag ni Harold nga antes magbalik sa trabaho, ginhakos pa ini sang amay kag ini ang nagtugon nga dal-an na lamang sini ang iya nga mga panapton bangod ini ang mapriso.
Ginalantaw ni Harold nga kun wala ini naglakat, mahimo nga sila sang iya amay ang nagka-engkwentro.
Nakibot na lamang ini sang nagtawag ang Barangay Kagawad sa ila driver kag siya ang ginhambalan nga magpauli.
Apisar sa natabo, wala man ini naakig sa amay bangod nakahibalo ini nga indi sini hungod ang natabo.
Suno diri, ang ila amay ang may nakaaway sadto kag sang may namatyan sila nga himata natabuan nga nagkitaay ang iya amay kag kaaway sini sa haya.
Didto ginlabo sang ila amay ang iya kaaway, apang bangod yara lang sa tagob ang binangon ini ang wala napatay.
Sila ang nagsaylo pa sa Negros Oriental, apang sa pagbalik sa ciudad sang Kabankalan ini ang ginserbihan sang warrant of arrest.
Napriso sang lima ka adlaw ang amay, apang nakagwa man matapos madismiss ang kaso.
Apang sa lima ka adlaw nga yara sa prisuhan, ini ang wala nagakaon kag nagatulog, kag sa paggwa didto na nagtuhaw ang sintomas sang nervous breakdown.
Suno kay Harold, may mga tion nga kun gina-abot ang ila amay ini ang nagapahayag na lamang sang “Diyos ko! Buligi man kami indi pabay-i ang pamilya ko.” apang kaangay nga ini ang napierde sang yawa.
Plano sini nga kun makagwa na sa ospital ang iya mga himata, ipaguba na lamang sini ang ila balay kag dal-on sa Negros Oriental ang iya iloy kag mga kauturan.
