Patay ang subject person sa drug buybust operation sang Cadiz City Police Station kag ginatudlo nga suspek sa shooting incident sa ciudad sang Silay, Negros Occidental sang Hwebes, Hulyo 10 matapos nga magbato sa mga kapulisan sa ginpatigayon nga drug buybust operation sang Biyernes sang gab-i.
Ginkilala ang suspetsado nga si Mark Pelayo 34 anyos wala sang trabaho kag residente sang Block 19 Lot 14 Villa Safrado, Barangay Burgos, Cadiz City.
Sa interview sang Bombo Radyo Bacolod kay Police Lt Lovella Cordova, Deputy Chief of Police sang Cadiz City Police Station, matapos nga mabaklan sang illegal nga druga si Pelayo kag nadiskubrehan sini nga isa ka Police ang nakatransaksyon sini gilayon ini nga nagpalupok kun sa diin ginbalusan man sang mga kapulisan.
Ang pagbayluhanay sang lupok ang nagdugay sang isa minutos.
Naigo si Pelayo sa ulo kag sa lawas rason sang kamatayon sini.
Nakuha sa paghinakop sini ang 17 ka sachets sang suspected shabu, isa ka improvised toother, isa ka caliber 45 nga may unod nga anum ka bala kag narekober man diri ang onse ka bala sang 9MM nga armas-luthang.
Madumduman nga si Pelayo ang ginatudlo nga suspek nga nagluthang sa tatlo ka persona sa wala mahibaluan nga rason.
Isa sa mga biktima ang napatay na samtang ang duha ang ginabulong pa.
Si Pelayo ang gina-alegar nga nagahallucinate kag nagapahayag nga ginalagas sang 20 ka tawo kag siya ang patyon.
Gilayon man nga ginsungka sang pamilya ang driver sang motorsiklo nga gina-angkasan ni Pelayo kag ini ang ginkilala kay Alyas RR, 24 anyos kag isa ka SK Kagwad sa banwa sang EB Magalona, Negros Occidental.
