Patigayunon ang Sugar Summit sa probinsya sang Negros Occidental subong nga Enero.
Sa interview sang Bombo Radyo kay Cadiz City Mayor Salvador “Bading” Escalante, Presidente sang Negros Association of Chief Executives (ACE), may patigayunon nga meeting kaupod ang mga lokal nga pamunuan kag mga lideres sang sugar industry agud nga diskusyonan ang nagapadayon nga problema sa manubo nga millgate price sang kalamay.
Suno kay Esacalante, sa summit usisa-on ang likod sang pagnubo sang presyo sang kalamay sa mga sugar central nga naga-apektado sa sugar planters kag mangunguma.
Madumduman nga sang nakaligad nga tuig, nagapanawagan ang pila ka mga sugar farmers ilabi na ang mga small planters sa national governement, bangud indi na sila makaginansya sang insakto bangud sa padayon nga pagnubo sang presyo sang kalamay.
Suno diri, dapat may klaro nga pagsulundan kag proseso kun may ginapatuman nga sugar importation, lakip na ang husto nga pagmonitor sang sugar plantation.
Suno dini, dapat likawan ang over-importation kag under-supply bangod ang sugar industry ang indi estable.
Isa sa mga ginalan-aw nga solusyon amo ang nagakaigo nga pagplano kag pag-usisa sang sugar industry nga mangin sentro sang diskusyunan sa Sugar Summit.
