Isa ka suldado ang pilason matapos maka-engkwentro sang 62nd Infantry Batallion ang kulang-kulang 15 ka mga Communist Terrorist Group samtang nagapatigayon sang combat operations sa Inangaw, Barangay Sundayao, Guihulngan City, Negros Oriental.
Suno kay Maj. Cenon Pancito III, tagpamaba sang 3rd Infantry Division sang Philippine Army, dagdangat sa 15 minutos ang pagbayluhanay sang lupok sang duha ka grupo samtang ang nasamaran naman nga suldado ang gindala na sa ospital kag yara na sa estable nga kundisyon.
Suno kay Pancito, ang engkwentro ang nagapamatuod lang nga may presensya sang NPA sa lugar.
Dugang pa sini nga ginkuha lang nila ang nasamaran nga suldado apang ang nabilin ang nagapadayun gihapon sa hot pursuit operation.
Nagpasalig man ini sa mga pumuluyo nga magapadayun ang ila operasyon kag nakita nga tuman ka epektibo ang taktika nga ginagamit.
Ini ang sige-sige, sunod-sunod kag wala sang untat nga operasyon sa tinutuyo nga mademoralisa ang pwersa sang NPA.
Sa karun wala pa sang nabatun nga report natuhoy sa recoveries bangod nagapadayun pa ang operasyon batok sa rebelde nga grupo.
