Nagnegatibo sa swab test ang 54-anyos nga lalaki nga napatay kag ginpalubong gilayon bangud ginapatihan nga suspected COVID patient.
Madumduman nga gindala sang Lunes sang udto sa Valladolid District Hospital si Ruben Jambaro bangud nagpin-ot ang dughan sini matapos nagkaon kag nag-inom sang soft drinks.
Pag-abot sa ospital ginbutang ini sa COVID area kag ginhambalan nga suspected COVID patient bangud sa shortness of breath nga iya gina-eksperyensya.
Ginhambalan man ang pamilya Jambaro nga kinahanglan nga irefer sa ospital sa Bacolod ang pasyente bangud nagakinahanglan ini sang tertiary care apang wala mahatagan sang referral ang pamilya bangud wala sang ospital nga mabaton bangud nga wala sang bakante nga bed kag ventilator.
Tubtob nga napatay ang pasyente alas-5:30 Lunes sang hapon kag gindiretso sa patyo agud nga ilubong apisar wala pa nakahibalo ang pamilya.
Sa interview sang Bombo Radyo Bacolod kay Jesselle Jambaro, hinablos sang napatay, ginpahayag sini nga may nagtawag sa ila kaina sang aga agud ipahibalo nga negatibo ang swab test result sang iya nga tiyo.
Ginkumpirmar naman sini nga ginsiraduhan na nila kahapon ang pantyon sang iya tiyo matapos sila nagpulaw sang Lunes sang gab-i.// Paga-istoryahan naman nila nga magpamilya kun ano ang plano kag masunod nila nga himuon.
Ginpanindugan man sini nga wala gid sila ginhatagan sang referral sang ospital agud masaylo sa Bacolod ang iya tiyo.
Saligmato ini sa depensa ni Dr. Myre Parpa, chief of hospital sang Valladolid District Hospital, kun sa diin iya ginpahayag nga naghatag gid sila sang referral apang wala lang sang ospital sa Bacolod nga maka-akomodar sa pasyente.
Nagapati man ang pamilya nga kun ginhatagan lamang sila sang referral, nasalbar pa kuntani ang pasyente.
Gin-athag man ni Jambaro nga wala man sang problema sa ila kun ipalubong dayon ang ila tiyo bangud naintindihan nila nga kabahin ini sang protocol apang kuntani ginpahibalo sila nga dal-on na ini sa patyo kag ginhatagan sila sang bisan lip-ot nga tiempo agud makita ang bangkay sini.
