Napasakaan na sang kaso nga murder ang suspetsado sa pagpatay sa isa ka senior citizen sa Purok Singco, Barangay Taculing, Bacolod City sang Lunes.
Madumduman nga ang suspetsado ang ginkilala nga si Louie John Barde, 21 anyos samtang ang biktima amo si Eduard Tornia, 60 anyos.
Madumduman nga nagalantaw sang TV ang biktima sa sulod sang iya nga balay sang hinali nalang nga nagsulod pinaagi sa main door ang suspetsado kag gilayon nga ginbuno sang steel rod ukon kabilya ang senior citizen nga nag-ungot sa iya nga mata.
Ang kabilya ang may kalabaon nga 14 inches kag ini ang narecover na matapos gindala sa Bacolod Adventist Medical Center (BAMC) ang biktima kun sa diin ini ang gindeklarar nga dead on arrival.
Suno kay P/Lt. Dax Santillan, officer-in-charge sa Bacolod Police Station 6, napasakaan na sang kaso nga murder ang suspetsado, samtang ginalantaw naman nga indi paghangpanay ang rasun sang pagpamuno.
Sa karun, naga-imprubar naman ang interaction sang mga kapulisan sa suspetsado, apang wala ini gihapon sang ginhatag nga impormasyon.
Nahibaluan nga sang tinalikdan nga mga inadlaw, halos indi masugilanon sang maayo ang suspetsado nga gina-alegar may naga-abot abot nga deperensya sa paminsaron.
Santo sa mga kapulisan, ang biktima ang may-ara man sang gina-inom nga maintenance, apang wala matumod kun para sa ano nga balatian.
Samtang wala na ginpa-autopsy sang pamilya ang bangkay ilabi na nga makita man sa death certificate nga ini ang napatay bangod sa pagbuno sa ulo.
