Naaresto na ang suspek nga naghold-up sa magnobyohanay kag naglugos pa sa babayi nga biktima sa isa ka kampo sa Barangay Palampas, ciudad sang San Carlos sang Marso 30, 2024.
Sa madumduman nga sang Marso 30, naga-inom-inom ang magnobyohanay nga wala lamang ginhingadlan kaupod ang isa nila ka abyan sang ginhagad sang 17-anyos nga nobyo ang nobya sini nga 28-anyos nga magpadulong sa kampo agud magpangihi, pasado alas 8:00 sang gab-i.
Sang yara na ang mga ini sa kampo, wala pa nakabatak sang iya pang-idalum nga panapton ang babaye sang hinali lamang ini nga ginlumpatan sang suspetsado kag ginhambalan nga maghapa kag ini ang ginhimuslan.
Gintaya-an naman sang armas luthang ang nobyo sini nga menor-de-edad samtang nagakatabo ang pagpanghimulos.
Suno diri, kapin isa ka oras nagdugay ang pagpanghimulos apang wala sang may nahimo ang nobyo bangud posible nga natrauma ini.
Pagkatapos sang pagpanghimulos, ginkuha pa sang suspetsado ang kagamitan sang mga biktima.
Sa interview sang Bombo Radyo kay Police Lt. Col. Nazer Canja, hepe sang San Carlos City Police Station, naaresto ang suspetsado nga ginkilala nga si alyas “Gilbert” kag naga-edad sang 45 anyos, nga ginakabig nga most wanted person sa ciudad paagi sa pagserbe sang warrant of arrest sa kaso sini nga Robbery with Violence Against or Intimidation of Persons sang tuig 2023.
Kasubong man nga ginfile ang kaso nga rape batok sa suspetsado.
