Kadungan sang iya kaadlawan, nagpasalamat si suspended Bamban, Tarlac Mayor Alice Guo ang iya mga constituents sa ila suporta sa tunga sang mga issues nga iya ginapangatubang sa karun.
Si Guo, nga suspendido matapos ang Senate investigation natuhoy sa ginaalegar kaangtanan sini sa illegal Philippine offshore gaming operations (POGO) sa iya banwa, ang nagpalab-ot sang iya pagpasalamat paagi sa Facebook.
Sa malaba sini nga post, ginpahayag nga wala ini naghinulsol nga siya ang nagsulod sa politika apang nagakasakitan ini sa mga nagakatabo.
Nagpasalamat man ini sa tanan nga grupo kag indibidwal lakip na ang education sector kag mga estudyante kag manunudlo sa Bamban.
Si Guo, nga nagselebrar sang ika-38 sini nga kaadlawan sang Hulyo 12, ang nagpangayo man sang pasaylo sa tanan nga naulamid sa mga issues nga nagapalibot sa iya kag nagpahanumdum sa tanan nga untaton na ang pagpalapta sang indi insakto nga mga impormasyon.
Samtang, ginpahayag naman ni Senator Sherwin Gatchalian nga ginalauman nga ma-issue ang arrest order batok kay Guo subong nga Biyernes ukon sa Lunes.
