Indi maapektuhan ang number of school days apisar sa pagpatuman sang pila ka adlaw nga suspension sang face-to-face classes tuga sang Severe Tropical Storm Kristine.
Sa interview sang Bombo Radyo Bacolod kay Hernani Escullar Jr., public information officer sang Department of Education Region 6, pila ka mga eskwelahan ang nag-umpisa sang suspension sang face-to-face classes sang Miyerkules, apang ginahulat pa nila ang report gikan sa 21 ka School Division Offices agud maconsolidate.
Apang sa inisyal nga data nga nabatun kahapon, nagadangat sa kwatro mil nga mga eskwelahan ang apektado sa Western Visayas.
Pasalig ni Escullar nga santo sa DepEd Order No. 9 ukon ang Official School Calendar, sa tion sang mga disaster ukon kalamidad kag magakinahanglan nga isuspend ang in-person classes ang tagsa ka buluthuan ang dapat nakahanda nga magshift sa Alternative Delivery Mode (ADM).
Kun sa diin ang eskwelahan ang dapat maghatag sang home tasks ukon magpreparar sang printed modules.
Ini ang counted man bilang isa ka School Days gani masunod gihapon ang School Calendar para sa School Year 2024-2025.
Paathag ni Escullar nga wala sang makakontrolar sa mga disasters ukon kalamidad kag luyag sang DepEd nga maseguro ang safety sang tanan kag mapadayun ang pagtuon sang mga kabataan.
Panawagan sini sa mga ginikanan nga tsekyaron kun ginahimo sang mga kabataan ang modules, activity sheets kag iban pa nga school works.
Paathag ni Escullar nga bangod naforecast sang temprano ang pagsulod sang bagyo ang DepEd ang nakapreparar na sang kinahanglan para sa shifting sa Alternative Delivery Mode.
Aminado ini nga napamatud-an na nga ang best way para sa pagtudlo sa mga kabataan amo ang in-person classes, apang indi nila mahimo nga ibutang sa risgo ang mga school personnel kag estudyante partikular na sa mga ginabaha nga lugar.
