Naghimo na sang extrajudicial confession ang suspetsado nga nagluthang patay kay Crystal Faith Jastiva a.k.a Ashley Kate Gonzaga sang tinalikdan nga Agosto 18.
Madumduman nga sang tinalikdan nga Agosto 18, si Jastiva ang nagbisita sa iya nga live-in partner sa BJMP kag sa iya nga paggwa, ini ang ginluthang sang riding-in-tandem.
Ang suspetsado amo si Tyron Barena, 27 anyos kag residente sang Purok 5, Brgy. Taculing, Bacolod City.
Sa press conference nga ginpatigayon, ginpahayag ni Police Major Charles Gever, commander sang Police Station 8, nga si Barena amo ang responsable sa pagpatay kay Jastiva.
Base sa panaysayon sang suspetsado, indi niya kilala ang biktima kundi ini ang gintudlo lamang sang iya abyan nga si Lablab Austria.
Antes natabo ang insidente, ginsugat ni Austria si Barena sa ila nga puluy-an kag ginhagad nga malibot-libot sa syudad sakay sa iya nga motorsiklo.
Matapos ang pila ka minuto sang ila paglibot-libot, gindul-ong siya balik ni Austria sa ila nga puluy-an kag ginhambalan nga sugaton lang ini liwat.
Mga alas 10 sang aga, ginsugat siya ni Austria kag naglibot sila liwat sa Brgy. Taculing, lusot sa BM, pakadto sa Brgy. Alijis kag sang yara na sila sa Bacolod Memorial Cemetery, ginhambalan siya ni Austria nga sauluhon ang ila nga gina-agyan.
Alas-10:30, gindul-ong ni Austria si Barena sa ila nga puluy-an, kag alas 12:20 sang udto, liwat sila nga naglakat.
Suno kay Barena, may nagtawag sa telepono ni Austria.
Ang duha ang nagtambay sang tatlo ka minutos sa gwa sang BJMP kag sang naggwa na si Jastiva kag naglabay sa ila nga kilid, didto na ini ginluthang.
Matapos sini, sila ang nagpadulong sa balay ni Austria kag didto siya gindahuan sang dos mil pesos.
Si Barena ang may utang nga 10 mil pesos kay Austria kag siya ang ginhambalan sini nga wala na siya sang utang kun iya mapatay ang ila nga target kag kun indi niya ini mahimo, siya ang pagapatyon.
Suno kay Gever, ginpahayag sang suspetsado nga siya ang nakonsensya rason nga siya ang nagsungka sa mga kapulisan kag gusto niya nga mahatagan sang hustisya si Jastiva.
