BACOLOD CITY – Nakilal-an na ang suspetsado sa pagluthang-patay sa isa ka babayi samtang pilason naman ang live-in partner sini sa Purok Medalla Milagrosa, Barangay Sum-ag, ciudad sang Bacolod.
Nahibaluan nga gilayon napatay si Maricar Marañon, 27-anyos, pumuluyo sang Punta Playa, Barangay Poblacion, ciudad sang Bago samtang ang pilason nga live-in partner ginkilala kay Melchor Flores, 48-anyos, pumuluyo sang Purok Medalla Milagrosa, Barangay Sum-ag.
Suno kay SPO3 Rammy Sayson, officer-in-charge sang Police Station 9, base sa inisyal nila nga pag-imbestigar, nagakatulog sanday Marañon kag Flores sang makabugtaw ang lalaki sang mabatyagan nga may nagsipa sang ila nga pwertahan.
Nagtindog si Flores apang ginpungkoy ini sang lalaki sang armas sa ulo rason sang iya pagkatumba apang liwat ini nagtindog kag gintapi ang kamot sang suspetsado nga nagataya sa iya sang armas apang hinali ini naglupok.
Naiguo sa tudlo sini si Flores samtang ang bala nagdiretso sa liog sang nagakatulog nga si Marañon rason nga gilayon ini napatay.
Isa sa mga ginasuspetsuhan nga may kahimuan sang krimen amo ang anay karelasyon kag amay sang bata sang babayi nga si Jose Rommel Jolito sang Barangay Pacol, ciudad sang Bago.
Ginpadulungan sang kapulisan ang balay sang ginikanan sang wala pa ginhingalanan nga suspetsado apang traysikol na lamang ang nabilin kag wala na ini sa lugar.
