BACOLOD CITY – Gilayon nga napatay ang isa ka babayi samtang padayon naman nga ginabulong sa isa ka pribado nga hospital ang live-in partner sini matapos ginluthang sa sulod mismo sang ila puluy-an sa Purok Medalla Milagrosa, Barangay Sum-ag, ciudad sang Bacolod las-11:00 kagab-i.
Ang napatay ginkilala kay Maricar Marañon, 27-anyos, pumuluyo sang Punta Playa, Barangay Poblacion, ciudad sang Bago samtang ang pilason nga live-in partner ginkilala kay Melchor Flores, 48-anyos, pumuluyo sang Purok Medalla Milagrosa, Barangay Sum-ag.
Suno kay SPO3 Rammy Sayson, officer-in-charge sang Police Station 9, base sa inisyal nila nga pag-imbestigar, nagakatulog sanday Marañon kag Flores sang makabugtaw ang lalaki sang mabatyagan nga may nagsipa sang ila nga pwertahan.
Nakit-an sini ang isa ka lalaki nga may uyat nga armas kag ginataya ini sa iya rason nga iya ini ginwahig apang naglupok ang armas kag nagkibyas ini sa iya nga tudlo apang nagdiretso ang bala sa nagakatulog nga si Marañon kag nag-igu ini sa iya nga liog.
Natumod na ang suspetsado, ang upod sini nga lookout kag ang traysikol nga gingamit bilang getaway vehicle.
Ginpadulungan sang kapulisan ang balay sang ginikanan sang wala pa ginhingalanan nga suspetsado apang traysikol na lamang ang nabilin kag wala na ini sa lugar.
