![](http://img.bomboradyo.com/bacolod/2019/03/almar.jpg)
BACOLOD CITY-Nag-ako na ang isa sa mga ssuspetsado sa pagpatay sang 10-anyos nga babaye sa ciudad sang Talisay.
Kaina sang aga, gin-ako sang 20-anyos nga si Almar John Durom ang pagpatay sa Grade 3 student nga si Marchel Sayo, Byernes sang gab-i.
Kadungan sini, ginlimpyuhan man ni Almar John ang ngalan sang iya 17-anyos nga manghod nga gin-akusaran man sa krimen.
Suno diri, siya lang isa ang nagpatay sa biktima kag nakapauli na sa ila balay ang iya manghod sa Barangay Zone 10, Byernes sang gab-i sang iya ginhimo ang krimen.
Ginsaysay sini nga naglabay sa balay nga ila ginitiran ang biktima kag iya ini gintawag nga ihaboy ang salad sa suba.
Sang nagsulod ini sa balay, diri na kag gintabunan niya ang baba sang bata tubtob nga napatay ini kag ginsulod niya sa labador, pasado las-8:00 sang gab-i.
Ginpahayag sini nga wala siya nakahibalo sang iya ginhimo kag kaangay nga gin-demonyo siya.
Ginpanindugan sini nga wala siya naka-inom kag nakagamit sang droga sang iya ginhimo ang krimen.
Gin-ako man sang suspetsado nga himo-himo lang niya ang pagpabangod kay “Jason Zamora”.
Si Jason ang una niya ginhambal nga iya migo nga nagkadto sa balay kag nagpatay sa biktima.
Kasunod sang iya pag-ako sa krimen, nagpangayo si Durom sang pasaylo sa pamilya sang 10-anyos nga biktima.