Willing gid ang tag-iya sang lechonan nga maghalin matapos ang reklamo ni Former Bacolod City Councilor Cano Tan nga ini ang nagabalabag sa iya nga road right of way.
Madumduman nga nagfile sang administrative kag criminal case si Tan batok sa apat ka mga department heads sang ciudad kag duha ka Bureau of Fire Protection (BFP) heads, bangod sa paghatag sang permits sa mga stall nga nagabalabag na sa iya road right of way.
Sa pagtsekyar sang Bombo News Team sa area, nakita nga kinahanglan nagid man mangalihid ang luyag nga maglabay sa dalan pasulod sa propedad ni Tan, bangod sa nagabalabag nga lechonan.
Sa interview sang Bombo Radyo Bacolod kay Ricas Velasco Acebuche, tag-iya sang ginsaraduhan nga lechonan, ginbutangan na kahapon sang closure notice ang iya nga stall.
Si Acebuche ang masobra 10 ka tuig na nga nagabaligya sa area, kag ini ang ginhagad lamang sang iya abyan sadto.
Aminado man ini nga pribado nga duta ang ginatukuran sini sang negosyo, rasun man nga sila ang wala nadala sa road widening program nga ginpatigayon sang nakaligad nga tinuig.
Suno kay Acebuche, sa tall permit sini nakapagkit nga sila ang dapat maghalin inkaso nga may magreklamo.
Apang sa malawig nga tinuig sini nga pagbaligya sa lugar, wala man sang may nagreklamo sa iya, kag nakibot na lamang ini sang mahibaluan nga ginkasuhan na ang mga opisyales sang ciudad kag siya ang kabangdanan.
Pahayag sini nga agud wala na sang isyu, siya ang magapangita na lamang sang masayluhan.
Dugang pa sini nga sa anay apat ka mga stall sa lugar, duha nalang sila ang nagapabilin nga naga-operar bangod sa mahina nga bentahanay, gani plano na gid man sini nga magsaylo sang pwesto.
