Pinaagi sa interview sang Bombo Radyo Bacolod, ginsorpresa sang Negrense nga number 6 sa August 2019 Certified Plant Mechanic Licensure Examination ang iya nga iloy kag mga utod sa Talisay City.
Sa resulta nga ginpagwa sang Professional Regulation Commission kaina sang kaagahon, pang-anom si Lope Escario Allerite Jr. sang Barangay Zone 6, Talisay City kag nakakuha ini sang 81.45 percent rating.
Si Allerite ang naggraduate sa Technological University of the Philippines-Visayas sa Talisay City sang tuig 2014 sa kurso nga Bachelor of Technology in Mechanical Engineering Technology.
Pito nga mag-ulutod sanday Allerite kag siya ang ikaduha.
Ang iloy sini nga si Josephine ang nagapanglaba kag bulagay na sila sang biological father ni Lope apang nakapamana ini kay Fermine Tabay nga isa ka panday kag sila ang nakaangkon sang lima ka mga anak.
Sang naggwa ang resulta sang board exam alas-3:00 kaina sang kaagahon, nagtawag gilayon si Lope sa iya iloy kag tuman ang kalipay sini sang nahibaluan niya nga nakapasar ang iya anak, apang wala nagpahibalo si Lope nga nakasulod ini sa Top 10 bangud luyag niya nga isorpresa sa husto nga panahon.
Sang nagpakig-angot ang Bombo Radyo para sa interview, ginpanugyanan sini ang iya iloy nga magpamati kag diri lang ini nakahibalo nga number 6 ang iya anak.
Suno sa 25-anyos nga si Allerite, pamilya gid niya ang iya inspirasyon sa paghimakas bangud handom niya nga makaeskwela man ang iya mga utod kag makatibawas sila sa kapigaduhon.
Sa karon, nagatrabaho ini sa isa ka multinational food and drink processing company sa Batangas.
