Natapos na ang tanan nga graduation schedule sa Department of Education (DepEd) division of Negros Occidental kahapon.
Sa interview sang Bombo Radyo Bacolod kay Ian Arnold Arnaez, public information officer sang DepEd – Negros Occidental, ang graduation period ang nag-umpisa sang Mayo 29 tubtob kahapon Mayo 31.
Ini bilang pagsunod sa DepEd order nga nagamando nga hatagan sang isa ka bulan nga break ang mga manunudlo kag estudyante halin Hunyo 1 tubtob 30.
Sa figures gikan sa planning officer, ginpahayag ni Arnaez nga nagdangat sa masobra 21,000 ang naggradwar sa Grade 6 samtang masobra 10,000 naman ang sa Senior High School.
Samtang parehas naman nga masobra 22,000 ang movers gikan sa Kindergarten kag Grade 10.
Sa pihak nga bahin, ginalantaw ni Arnaez nga indi DepEd ang nagviral nga video kun sa diin nagasinaot ang mga estudyante sa ibabaw sang stage matapos magkuha sang diploma
Aminado ini nga wala sang guidelines nga nagadumili sini, apang ginasunod gid sang DepEd ang guidelines nga ang graduation rites ang dapat patigayunon nga solemn kag dignified gani ini ang dapat man nga tahuron.
Dugang pa sini nga may mga DepEd officials gikan sa division nga nagabisita sa mga graduation ceremonies bilang guest speaker ukon agud lamang magkumpirmar sang mga graduates.
Sa pihak nga bahin, wala man sang pagsulundan ang DepEd nga nagadumili sa pagtakod sang mga ginikanan ukon guardians sang money garlands.
Paathag sini nga indi nila ini pwede nga sawayon bangod wala man sang offense nga nahimo.
Nagapati ini nga ang pagtakod sang ginikanan sang money garlands ang expression lamang sang ila paghigugma sa mga kabataan.
