Aminado ang pinuno sang Provincial Disaster Management Program Division (PDMPD) nga may yara sila sang kabudlayan sa pagpatigayon sang rescue operations sa nagluntad nga pagbaha sa Northern Negros sang nagligad nga Enero 8.
Madumduman nga apektado sang pagbaha ang Talisay City, Silay City, EB Magalona, Victorias City, Escalante City, Sagay City, Cadiz City, Toboso kag Manapla.
Suno kay PDMPD head Dr. Zeaphard Gerhart Caelian, tuman gid ka limitado sang ila nga resources kag ang ila nga rescuers ang pipila lamang.
Magluwas dira, may mga pumuluyo gid nga nagapakatig-a kag wala naga-evacuate dayon.
Suno sa iya, ginahulat pa sang iban nga magsaka gid ang tubig-baha antes magbiya sa ila panimalay.
Nahibaluan nga una na nagdeklarar sang state of calamity ang Talisay City, Silay City kag Victorias City kasunod sang nagluntad nga una nga pagbaha sang Enero 1.
Sa karon, ginahulat pa ang desisyon sang iban nga mga local government units (LGUs) kun magadeklarar man sila sang state of calamity agud magamit ang ila nga disaster fund.
