Tatlo ang nasamaran matapos magluntad ang sunog sa isa ka balay sa Purok Caingin, Barangay Punta Taytay, Bacolod City kaina sang kaagahon.
Nahibaluan nga ang balay nga nasunog ang ginapanag-iyahan ni Rodolfo Ramos.
Nabatun sang Bacolod City Fire Station ang report alas-3:23 kaina sang kaagahon samtang ang sunog ang nagdangat sa first alarm.
Nahimo naman nga mafire out ang sunog alas-4:02 sang kaagahon apang totally burnt ang nasambit nga balay.
Ang 60 anyos nga si Rodolfo Ramos ang nakaangkon sang first degree burns sa nawala nga butkon kag natuo nga abaga; asawa sini nga si Flordelisa Ramos nga nag-agom sang first degree burns sa natuo nga kamot kag abrasion sa natuo nga batiis; kasubong man ang ila nga bata nga si Pewie Ramos nga nakaangkon sang first degree burns sa nawala nga butkon.
Ginabanta nga nagadangat naman sa P1 million ang balor sang nangin kahalitan sa sunog.
Sa karun padayun pa ang imbestigasyon sang Bureau of Fire Protection (BFP) sa gintunaan sang kalayo.
Sa pihak nga bahin, apisar nga naga inikit-ikit ang mga pamalay sa lugar, wala naman naglapta ang kalayo sa kaingod bangod sa sementado man ang palibot sang nasunog nga balay.
Sa interview sang Bombo Radyo Bacolod kay Rodolfo Ramos, tulog ang mga ini sang nag-umpisa ang pag-ibwal sang kalayo.
Ginapakamaayo naman sini nga nakabugtaw ang iya nga bata bangod sa paggino-al sang mga ido kag didto na nahibaluan nga nagakasunog ang ila puluy-an.
Sa pihak nga bahin naman sang balay nag-agi ang iya bayaw kag apo agud nga makagwa samtang bangod sa nagdamol na ang aso, napilitan ini nga buk-on ang jalousie sang ila bintana nga nagresulta man sang iya pagkapilas.
Aminado man ini nga sila ang naglibot sa tinutuyo nga masalbar ang mga pagkabutang kaangay sa NMAX, apang indi niya ini maduso gani ginhingagaw nalang nga mapagwa ang ila salakyan.
Samtang kaupod man sa nasunog ang bag-o sini nga mountain bike.
Ginapakamaayo naman sini nga may spare key ini nga ginahamtang kalapit sa isa ka piyertahan nga amo ang gingamit sang iya bata kag asawa agud makagwa sa balay.
Suno diri, sa karun ginalantaw nga electrical ang gintunaan sang kalayo, samtang gincontact naman sini ang iya nga electrician agud magpaathag sa problema sa ila kuryente.
Ginkumpirmar man sini nga may nadulaan sang kabuhi sa ila kaingod, apang ini ang may ginasuprer na nga balatian antes paman ang pagluntad sang sunog.a
Paathag sini nga wala nakatabok ang kalayo sa kaingod nga mga balay bangod mataas ang firewall sang ila puluy-an.
Nagpanawagan man si Rodolfo sang bulig gikan kay Bacolod City Mayor Alfredo “Albee” Benitez, bangod siya ang empleyado man sa City Health Office.
Sa pihak nga bahin, nagahingyo man ini sang bulig sa iya mga himata kag iban pa nga may bulawanon nga tagipusuon bangod wala sang nabilin sa ila pagkabutang matapos ginlamon sang kalayo.
