Patay ang tatlo ka persona matapos gin-arado sang 10-wheeler truck ang duha ka motorsiklo sa Barangay Tooy, Himamaylan City, Negros Occidental pasado alas-6:00 kaina sang aga.
Ang mga biktima ang ginkilala nga sanday Jinuard Lirazan, 40 anyos kag Cesar Lirazan, 23 anyos, residente sang Sitio May-ang, Barangay Tagukon, Kabankalan City kag angkasanay sa isa ka motorsiklo; kag Danny Delalinia residente naman sang Sitio Taypon, Barangay Carol-an, Kabankalan City.
Sila nga tatlo ang lunsay padulong kuntani sa trabaho bilang construction worker sa Bacolod City.
Apang pagdangat sa lugar, sila ang aksidente nga naarado sang 10-wheeler truck nga ginamaneho ni Benjie Agoilo, 48 anyos, residente sang Brgy Maytubig, Isabela.
Ginhingagaw pa ang tatlo dala sa ospital apang gindeklarar nga dead on arrival.
Gilayon man nga nagsurrender sa kapulisan ang driver sang truck.
