Aminado ang program head sang chemical technology department sang Technological University of the Philippines-Visayas (TUP-V) nga may yara sang kabudlayan ang mga manunudlo sang naghimugasa ang COVID-19 bangud wala sang face to face classes.
Sa interview sang Bombo Radyo Bacolod kay Prof. Fritzie Asuncion, dako ang impact sang COVID-19 pandemic sa edukasyon.
Suno kay Asuncion, bangud sa pandemic naghimo sila sang resilient solution agud nga mapadayon sang pagtudlo sa mga estudyante.
Ginpahayag sini nga isa sa kabudlayan nga ila nasugata sa pagtudlo sangng COVID-19 pandemic amo ang pagtudlo sang actual laboratory skills.
Suno kay Asuncion, nagapangduha-duha sila kun handa na ang ila mga estudyante sa pagkuha sang board exam.
Apang bangud sa pabor sang Ginoo kag sa bulig sang mga competent nga mga manunudlo sang TUP-V, ang 65 ka mga chemical technology student nga nagkuha sang pasinawan, lunsay ang mga ini nakapasar.
Ginpahayag man sini nga nagpatigayon man sila sang lab team teaching agud nga makalagas ang mga estudyante sa learning gap bangud sa COVID-pandemic.
Ang TUP-V ang ginkilala sang Professional Regulation Commission (PRC) kag Chemical Board nga Top Performing Chemical Technological School sa bilog nga Pilipinas matapos nga 100 percent na ang passing rate, nakuha pa sang mga ini ang rank 1 kag rank 5 sa mga passers.
Indi lamang ini ang una nga kahigayunan nga nagpanguna ang TUP-V sa passers sa board exam sa chemical technology bangud sang 2018; 2019 kag 2021 sila ang napanguna man.
Naoverwhelmed man ang mga manunudlo sa nangin resulta sang board exam sang chemical technologist apisar sang mga kabudlayan nga gin-agyan bangud sa COVID-pandemic.
Ang passers sang chemical technology board exam sang TUPV ang una nga batch sang K-12 graduates nga nagkuha sang nasambit nga degree.
