Ginakabig nga inhustisya sang labor advocate ang pagpa-untat temporaryo sang Pasig Court sang pagpatuman sang P85 minimum wage increase sa Metro Manila paagi sa Temporary Restraining Order.
Sa interview sang Bombo Radyo Bacolod kay Wennie Sancho, Secretary General sang General Alliance of Workers Association (GAWA) inhustisya ini sa bahin sang mga mamumugon bangud nga naaprubahan na ang wage order nga magapatuman sang P85 nga wage increase apang gin-issuehan pa sang TRO sang korte.
Suno kay Sancho ang ginhimo sang management amo ang paglapas sang layi sa idalom sang National Wages and Productivity Commission.
Suno kay Sancho, mahimo lamang nga mag-appeal sa kun pila ang ipatuman nga wage increase sa Regional Tripartite Wages and Productivity Boards apang indi dapat pagpunggan ang pagpatuman sini.
Suno diri, ini ang una nga kahigayunan sa kasaysayan sang labor nga ginpauntat sang korte ang pagpatuman sang wage orders.
