Aminado ang isa ka tenant sa Manokan Country nga mahapos lang bayaran ang P2,500 nga monthly rental sa Bacolod City government kun hungdon sang manugbayad.
Una na nga ginpahayag sang City Treasurer’s Office nga nagsaka na ang ila nga collection humalin sang nangin updated ang pagbayad sang mga tenants sa Manokan Country.
Sa interview sang Bombo Radyo kay Rosario Tutor, madamo sila sang customer sa karun ilabi na nga nagahilapit ang bulan sang Disyembre.
Suno sa iya, ang ila ginansya ang supesyente na nga makatabon sa ila mga kinahanglanon kag may yara pa sang sulusobra, basta indi lang sila mapierde.
Nahibaluan nga nagabayad sang P2,500 kada bulan ang mga tenants nga para kay Tutor barato na, nga masarangan mabayaran, apang kinahanglan nga magbayad gid antes ang katapusan sang bulan bangod nga may yara sang dugang sa ila nga balayran kun sila ang maglapaw kag mahimo nga P3,000 ang ginabayaran naman sang may mga utang.
May yara man sang nagapanukot sa ila sa kada adlaw nga ginabayaran nila sang P10 tubtob P20.
Kag apisar nga may pagsaka sa presyo sang manok, madamo sa gihapon ang nagapalapit nga mga customer kag maayo ang lakat sang negosyo.
