BACOLOD CITY — Isa ka “hoax” ukon indi matuod nga impormasyon ang nagasirkular sa social media kag text messages nga may igalunsyar nga pagpangatake ang ginhugpong nga pwersa sang ISIS-Maute kag Bangsamoro Islamic Freedom Forces (BIFF) sa mayor nga mga lugar sa pungsod sa maabot nga Hunyo 30.
Ini ang ginpahayag ni 3rd Infantry Division, Philippine Army Commander Major General Jon Aying sa pagbisita sini sa Negros Occidental kahapon.
Suno kay Aying, wala naghalin sa militar ang amo nga impormasyon kag sa pihak nga ila ini gin-verify, indi man nila ini makumpirmar.
Suno kay Aying, daku ang posibilidad nga kaangay lamang ini sang naglapta nga impormasyon antes ang Independence Day sadtong Hunyo 12 kun sa diin may mga pamahog sang pagpangatake sang mga terorista apang wala man ini natabo.
Sa pihak nga wala sang rason agud mag-panic ang publiko, ginpaalinton ni Major General Aying nga kinahanglan nga mangin alerto kag maaligmaton ang publiko sa nagakahanabo sa palibot bangud sang posibilidad sang pagpangatake.
Ginpabaskog naman sang militar ang intelligence monitoring sini, lakip na ang pagpalig-on sang koneksyon sa komunidad, agud mapagar ang anuman nga kalakasan.
