Bilang kabahin sang pagpanghanda sang probinsya sang Negros Occidental sa posible nga pagbalik sang commercial flights sa Bacolod-Silay Airport sa Hunyo 15, nagpahamtang ini sang thermal scanner kag swab-testing booth sa paluparan.
Sa interview sang Bombo Radyo Bacolod kay Provincial Administrator Atty. Rayfrando Diaz, ginpahayag sini nga nag-install na sila sang thermal scanner sa airport kun sa diin may yara ini sang alarm system.
Halimbawa suno kay Diaz nga kun ang temperatura sang magaabot nga overseas Filipino worker ukon Locally-Stranded Individual ang yara sa 37.6 degree Celcius pasaka, gilayon nga I-examine ang pasahero.
Pagkatapos makuhaan sang temperatura, mabutang sila sang ila nga health card sa booth nga ginpahamtang sa Tourism Office agud mahapos sa ulihi ang contact tracing.
Pagkagwa nila, madiretso ang mga pasahero sa swab-testing booths.
May yara sang lima ka mga medical technologist nga ginbutang sa airport agud magpatigayon sang swabbing.
Pagkatapos nga makuhaan sang swab sample, mahulat ang mga ini sa waiting area tubtob nga sugaton sila sang ila tagsa ka mga local government units para iquarantine sa tagsa sini ka mga pasilidad sa ila banwa kag ciudad.
Gin-athag naman ni Diaz nga ang mga LSIs ang ihome quarantine na lang samtang ginahulat ang test results samtang ang mga repatriated OFWs ang kinahanglan gid nga ipaidalom sa mandatory 14-day facility quarantine.
Kagab-i, 29 ka mga repatriated Negrense OFWs nagikan sa Manila ang nag-abot sa probinsya paagi sa PAL Sweeper Flight.
