Ginkwestyon ni Senator Raffy Tulfo si Tourism Secretary Christina Frasco bangud sang gina-alegar paghighlight sa iya kaugalingon sa baylo nga tourist destinations sa pila ka tourism promotion materials.
Sa hearing sang Senate Committee on Tourism, ginpakita ni Tulfo ang slides sang magazines kag iban pa nga material kun sa diin, hayag nga na-feature ang nawong ni Frasco.
Ginmitlang niya ang isa ka magazine nga naglapta sa Japan kun sa diin, ginpahayag ni Tulfo nga isa ka “missed opportunity” ang material agud ma-promote ang Philippine tourism sa gwa sang pungsod.
Dugang pa ni Tulfo, nga nakabaton ini sang mga reklamo nga naga-alegar nga gina-promote ni Frasco ang iya kaugalingon pinaagi sa tourism materials.
Pahayag niya, dapat tutukan sang Department of Tourism (DOT) ang pagpakita sang mga destinasyon, pagkaon, wellness kag Filipino culture sa baylo nga personalities.
Bilang sabat, ginpahayag ni Frasco nga wala sia nagpasugot sa paggamit sang iya picture sa magazine kag ginsiling nga wala sang government funds nga gingamit sa pag-publish sang material.
Gin-athag man niya nga wala ini sang rason nga mag-engage sa self-promotion bangud wala sia sang plano nga magpadalagan sa 2028 elections.
Ginsabat naman ni Tulfo nga wala ini naga-akusar kay Frasco nga nagahanda para sa pagpadalagan.
