Nauntat ang trabaho sa Office of the Vice President matapos ang isa ka bomb threat sang Lunes sang hapon.
Suno sa opisina ni Vice President Sara Duterte, ginapasalamatan na lamang nga wala sang nakit-an nga explosive devices kag nagresume na ang operasyon sang OVP alas 4:00 sang hapon.
Ang mga personnel sang OVP ang ginmanduan nga mag-evacuate sa isa ka secured area sang Robinsons Cybergate Plaza sa Mandaluyong City matapos nga isa ka staff member ang nagreport nga nakabaton sang isa ka text message nga naga-unod sang bomb threat.
Gilayon naman nga gindispatch ang isa ka explosive ordinance disposal team nagikan sa Mandaluyong Police sa area agud magpatigayon sang maid-id nga search.
Suno sa OVP, ang bomb threats ang isa ka seryoso nga butang nga nagaconcern sa public security kag safety kag ginapahanumduman ang publiko nga ang hoax bomb threats ang makahalit sa kabuhi kag sarang nga mapasabat sa layi ang may kahimuan sini santo sa Presidential Decree No. 1727, ukon kilala nga Anti-Bomb Joke Law.
