Magabalik na sa pagbyahe subong nga adlaw ang mga traditional jeepneys sa Bacolod nga wala sang prangkisa.
Sa interview sang Bombo Radyo kay Diego Malacad, secretary general sang United Negros Drivers and Operators Center (UNDOC), nagapati ini nga sila ang gina-isolate, gina-intimidate kag ginabully sang Land Transportation Franchising and Regulatory Board (LTFRB) 6 kag Land Transportation Office sa ginhimo nga anunsyo tuhoy sa pagtsekyar sang mga papeles sang mga public utility jeepneys sa Bacolod kahapon.
Suno kay Malacad, sila ang ginhatagan na sang authority nga magbyahe tubtob Marso 2023 kag nakameeting naman sila sang tinalikdan kaupod sanday Mayor Alfredo Benitez kag Councilor Al Victor Espino, chairman sang Committee on Transportation, kun sa diin magapadayon anay sa pagbyahe ang mga traditional jeepneys bangud indi nila luyag nga madamo ang magutman.
Suno sa iya, gintiming lamang nga wala ang alkalde bangud yara ini sa Japan kag nagdangop ang mga operators sang modernized jeepney sa LTFRB 6 sang tinalikdan nga Domingo nga indi nila masarangan ang kapin P30 mil tubtob P40 mil nga balayran kada bulan gani ila ginalaot ang mga traditional jeepneys agud sila ang makabawi.
Suno kay Malacad, dapat wala na nagpagwa sang press release ang ahensya nga sila ang magatsekyar bangud ini ang nagapakita nga daw kaangay sila ang nagapamahog kag nagapang-intimidate.
Kahapon, nagpatigayon sang untat byahe ang pila ka mga traditional jeepneys sa ciudad nga wala sang prangkisa matapos ang anunsyo sang LTFRB 6 nga inspection.
Suno kay Malacad, subong nga adlaw, magabalik na sila sa pagbyahe kag kun sila ang pagadakpon gid man, igasurrender na lamang sang mga ini ang ila mga jeep ka igarahe sa LTO bilang pagpakita sang under protest.
