Ginakabig sang deputy head sang Bacolod Traffic Authority Office (BTAO) nga generally peaceful kag nangin madinalag-on ang pagpatigayon sang Bacolaodiat Festival 2025.
Sa interview sang Bombo Radyo Bacolod kay Jose Antonio “Jojo” Robello, indi man malikawan nga wala sang reklamo nga mabaton ilabi na nga may yara sang mga dalan nga nagbug-at ang dalagan sang trapiko bangud sa mga road closures bangud man sa event.
Suno kay Robello, indi man perfect apang mas matawhay ang traffic management sa karun nga tuig nga pagselebrar sang Bacolaodiat Festival kun ipaanggid sang 2024 nga selebrasyon.
Suno diri, apisar sang kakulangan sang traffic enforcers nga adlaw-adlaw ginaproblema sang nasambit nga departamento, nangin madinalag-on ang pagbantay sang dalagan sang trapiko kasunod sang selebrasyon sang Bacolaodiat Festival 2025.
Nagpasalamat man ini sa media outlets nga nagbulig sa ila information dissemination agud nga mapaalinton sa mga motorista kasubong man sa publiko angot sa mga road closures kag rerouting bangud sa nasambit nga event.
