Gin-athag sang secretary-general sang United Negros Drivers and Operators Center nga wala sila nagapamatok sa jeepney modernization program kundi nagaayo lang sa gobyerno nga pahanugutan sila nga magbakal sang modernized jeepney sa iban nga car compani kag indi sa isa lang ka Chinese brand nga aprubado sang Department of Transportation.
Sa interview sang Bombo Radyo kay Diego Malacad, ang mga driver sang modernized jeepney ang nagikan man sa traditional jeepney.
Samtang ruta gihapon sang traditional jeepney ang byahe sang modernized jeepney gani ila nga ginaharass ang mga dumaan nga jeep.
Suno kay Malacad, kuntani wala lang sa laksamanay sa ruta agud nga indi mag-ilinaway ang mga driver.
Aminado ini nga kinamatarong sang mga pasahero kun sa diin sila masakay apang dapat nga hitso lang ang ruta.
Suno diri, indi pareho ang ruta nga labayan sang traditional kag modernized jeepney.
Gin-athag sini nga wala sila nagapamatok sa modernisasyon apang tuman kamahal ang modernized jeepney nga nagabili sang P2.9 million.
Suno kay Malacad, kuntani buksan nalang sa merkado ang pagbakal sang salakyan nga nagagamit sang Euro 4 nga makina, walay sapayan sang brand sang salakyan.
Ini bangud nahimo nga P2.9 million ang bili sang isa ka unit nagikan sa P800,000 tubtub P1 million.
JMC ang bag-o nga unit sa karon nga modernized jeepney nga human sa China.
Suno diri, wala sila nagasalig sa kalidad sang salakyan nga himo sang China bangud indi ini mabakod.
Gin-athag man sini nga UNDOC ang una nga nagtukod sang kooperatiba sa Bacolod kag nag-imbitar sa mga investors sang modern jeep nga patimaan nga wala sila nagapamatok sa modernisasyon.
