Nagapasalamat ang chairman sang Sentrong Samahan ng mga Tsuper at Operator sa Negros Occidental (SSTONE) sa alkalde sa syudad sang Bacolod bangud sa paghatag sang pagtamod sa problema sang transport sector.
Sa interview sang Bombo Radyo Bacolod kay Albert Villanueva, nagmeeting na ang mga ini kahapon agud makadihon sang pormal nga sulat angot sa ila ginahingyo para sa jeepney modernization program.
Suno kay Villanueva, wala sila nagapamatok sa jeepney modernization program kundi nagaayo lamang sila nga panubuan ang standard sang modernization program kag ang sistema bangud ang sistema ang wala nila manamian ilabi na sang magagmay nga operator kag masubo nga panumdumon ang palangabuhian nga nangin bread and butter sa sulod sang pila ka tuig sang pamilya ang pauyatan sa iban nga tawo.
Suno pa kay Villanueva, ang nasambit nga programa ang nagsunod lamang sa Acta Republika sang Clean Air Act nga tuman kataas ang standard kag ang pinakamasakit ang palangabuhian sang indibidwal kag magagmay nga operator ang iendorso pa sa kooperatiba ukon korporasyon.
Suno diri, tinguhaan man nila kuntani nga macomply ang yara sa standard sang LTFRB para sa modernization apang mas maayo kun ini ang indibidwal sagihapon kag indi na kinanlan magconsolidate sa isa ka kooperatiba ukon korporasyon nga wala man sila nakahibalo kun sin-o man gid ang makabenepisyo.
Mahimo man suno kay Villanueva nga irehabilitate sang mga ini ang ila mga jeepney units nga mangin compliant sa Clean Air act kag indi na magbakal sang unit nga masobra P2 milyones ang bili kag indi na sila ang magapanag-iya sang prangkisa kundi ang korporasyon na.
Suno diri indi sila nanamian sang nasambit nga patakaran.
Nagapangabay man ini nga antes mag Nobyembre 23 masolusyunan na ang ila ginapangatubang nga problema sang traditional jeepney operators.
Dako man ang pagsalig sang mga ini nga may mahimo nga solusyon ang alkalde sang syudad sang Bacolod kag indi sila pagpabay-an.
