Nag-upod sa ginpatigayon nga nationwide transport strike ang pila ka transport sector sa ciudad sang Bacolod kag probinsya sang Negros Occidental.
Kaina alas- 8:00 sang aga nagtipon ang Bacolod Alliance of Commuters, Operators, and Drivers (BACOD-Manibela) sa Bata Flyover kun sa diin may yara sang bitbit nga placards ang mga driver kag nagasinggitan sang panawagan nga hatagan na sila sang ayuda, kag kakason ang excise tax, value added tax, kag oil deregulation law.
Sa interview sang Bombo Radyo Bacolod kay Rudy Catedral, presidente sang BACOD-Manibela, nagapati ini nga ang gintingob nga pwersa sang jeepney drivers, taxi drivers kag tricycle drivers sa pagpanawagan, amo ang rason nga may yara sang pagnubo sa presyo sang produktong petrolyo.
Suno diri, dapat hatagan man sang ayuda ang mga jeepney drivers ilabi na sa karun nga may yara sang krisis.
Suno kay Catedral, nagadugang pa gid sa ila kabudlayan ang iban nga gas stations nga wala nagasunod sa insakto nga implementasyon kun pila ang idugang ukon ibuhin sa presyo.
Samtang, pa-athag sini nga indi nila luyag nga mabudlayan ang mga pasahero kun may yara sang transport strike apang ginatinguhaan nila nga mapalab-ot sa national government ang ila sentimento kag demanda. Samtang, may grupo man nga nagtipon sa Magsaysay Flyover sa barangay Singcang-Airport, Bacolod City para magpabutyag sang ila sentimento sa gobyerno.
Masobra sa 800 ang nagtipon sa flyover nga ginalakipan sang mga miyembro sang Kabacod Negros Transport Organization (KNETCO), One Negros Ecumenical Council (ONEC), mga estudyante kag mga mamumugon.
Sa interview kay Lilian Sembrano, presidente sang KNETCO, alas-6:00 kaina sang aga nagtipon na sila para sa transport strike kag rally protesta.
Suno diri, ila ginapanawagan sa presidente nga indi na magpabungol-bungol sa ginahingyo nga P55 rollback sa presyo sa kada litro sang produktong petrolyo.
Suno diri, nakahibalo siya nga bilyones ang ginaginansya sang mga oil companies amo nga dapat mangita sang pamaagi ang gobyerno para masolusyonan ang problema.
Suno kay Lilian, ginapanawagan sini ang gilayon nga rollback sa presyo bangod tuman ka gamay kun may yara sang pagnubo apang madako naman kun may yara sang pagsaka.
Pahayag sini ang epekto sang pagsaka sang gatong nagresulta sa pagtriple sang preyso sang mga balaklon.
Samtang, matapos ang rally protest, alas- 2:00 sang hapon nakpadulong naman sila sa Bacolod City Public Plaza para magpatigayon sang rally.
