Nagapanawagan ang secretary general sang United Negros Drivers and Operators Center (UNDOC) sa mga drivers, operators kasubong man sa mga pasahero nga dapat ipabatyag sa gobyerno ang kabudlayan nga ginatuga sang tuman kamahal nga produktong petrolyo kun sa diin magamahal man ang pamasahe sa pampubliko nga salakyan.
Sa interview sang Bombo Radyo Bacolod kay Diego Malacad, dapat nga buhinan sang gobyerno ang ginapatuman nga excise tax sa fuel products agud nga indi man magtuman kamahal ang pagbaligya sang mga fuel stations.
Suno kay Malacad, wala ini nagapamatok sa mga polisa sang gobyerno apang dapat man lantawon ang epekto sini sa mga Pilipino.
Suno diri, dapat lantawon sang gobyerno ang ginahimo nga solusyon sa mga problema kaangay lamang sang pagsaka sang presyo sang produktong petrolyo bangud indi lang dapat ang mga driver ang makabenepisyo sang solusyon nga pagpasaka sang pamasahe kundi dapat paminsaron ang mga pasahero.
Suno pa kay Malacad ang Libre Sakay ang indi man maayo bangud indi man tanan kasakay.
Ginalantaw man ni Malacad nga ang Libre Sakay ang ginahalinan sang korapsyon.
Suno diri mas maayo kun ibutang nalang ang discount sa mga gasoline stations kag tanan ang makabenepisyo kasubong man malikawan ang korupsyon kag determinasyon.
Ginpahayag man sini nga ang problema sa subong nga administrasyon ang indi transparent sa ginapatigayon nga konsultasyon sa transport sector.
Isa pa sa panawagan sini nga ipabatyag sang mga local government units (LGUs) sa national government ang matuod nga sitwasyon sang riding public kasubong man sang mga drivers.
Gin-ako ni Malacad nga ginaupdan nila ang iban nga transport groups nga nagaduso sang saka sa pamasahe apang aminado ini nga dako naman ini nga palas-anon sang mga pasahero.
