Lauman sang mga commuters sa Lunes ang pagkaparalisar sang byahe sang 95 porsyento sang public utility jeepney sa Negros Occidental kadungan sang nationwide transport strike batok sa Public Utility Vehicle Modernization Program.
Sa interview sang Bombo Radyo kay Sentrong Samahan ng mga Tsuper at Operators Negros (SSTONE) secretary-general Jessie Ortega, nakabaton sila sang notice nagikan sa Alyansa Kontra Phase Out nga may patigayunon nga transport strike sa Setyembre 30 gani gilayon sila nga nagsapol sang Martes.
Sa nasambit nga meeting suno kay Ortega, nakasugtan nga magaupod ang SSTONE kag iban nga transport groups nga magauntat sang byahe halin alas-5:00 sa aga tubtub alas-5:00 sa hapon sa Setyembre 30.
Bangud sini, lauman ang 95 percent paralyzation sang mga PUJ nga magabyahe.
Nagpanawagan man ini sa mga operator kag driver nga updan ang strike agud ipabutyag ang ila pagpamatok sa jeepney modernization program nga ipatuman na sa Hulyo 1 tuig 2020.
Panindugan ni Ortega, para lamang sa dalagko nga kompaniya ang modernization bangud hingalitan nila ang kahigayunan nga obligaron sang gobyerno ang magagmay nga operator nga mangin kabahin sang kooperatiba kag maka-operate sang modernized jeepney.
‘DOTR SECRETARY RESIGN’
Ginapanawagan sang pila ka transport groups ang pagresign ni Department of Transportation Secretary Arthur Tugade samtang nagahilapit ang full implementation sang Public Utility Vehicle Modernization Program sa Hulyo 1 tuig 2020.
Suno kay SSTONE secretary-general Jessie Ortega, si Tugade gid ang nagaduso nga dayunon na ang amo nga programa, bisan nagahipos lang si Presidente Rodrigo Duterte.
Suno kay Ortega, masarangan sang operator nga magbakal sang Euro 4 nga makina bangud indi ini tuman kamahal apang nagapamatok sila sa pagtukod sang mga operator sang kooperatiba nga amo ang magapanag-iya sang modernized vehicle.
Madamo na suno sa SSTONE secretary-general sang operator nga nagbuya sa ila prangkisa agud mag-upod sa kooperatiba apang wala nag-ayuhan.
Ang pinakamanubo nga balor sang modernized jeepney ang nagadangat sa 1.9 million pesos gani indi ini masarangan sang isa ka operator.
Sa tion nga ibaligya sa gobyerno ang daan nga jeep suno kay Ortega, 80 mil pesos ang magakadto sa kooperatiba kag 20 mil pesos lang ang magakadto sa operator bilang scrap value.
Wala pa sang plano ang SSTONE nga mag-file sang petition nga sakaan ang pamasahe kadungan sang pagsaka sang presyo sang produktong petrolyo.
FARE INCREASE?
Suno kay Ortega, ang pag-atake sa oil facility sang Saudi Arabia ang mayor nga rason sa dako nga price hike sa gasolina kag krudo bangud dako nga supply sa world market ang nagikan sa Saudi.
Idugang pa diri ang pagstock sang gasolina kag krudo sang mga pungsod nga maga-eksperyensya sang winter season.
Nagpagwa man ang Department of Energy sang pahayag nga magadangat sa siete pesos ang kabug-usan nga igasaka sa presyo sang produktong petrolyo tubtub sa bulan sang Disyembre.
Kun sinsero ang gobyerno nga magbulig sa pagpanubo sang presyo sang gatong suno kay Ortega, dapat nga isuspend sini ang implementasyon sang excise tax sa petroleum products.
Sa tion nga maglapaw na sa 46 pesos ang kada litro sang krudo suno sa SSTONE secretary-general, ini na ang tion nga maga-file sila sang petition para sa fare increase.
