Magasapol ang mga miyembro sang Handumanan Trycicle Operators and Drivers Assoction (TODA) kag mga opisyales sang Barangay bwas sa hapon, agud diskusyunan ang reklamo tuhoy sa tuman ka damo nga mga colorum nga tricycle.
Sa interview sang Bombo Radyo Bacolod kay Handumanan TODA President Diego Malacad, sila ang nagpatigayon sang silent protest kahapon kadungan sa State of the Transport Address (SOTA) sang mga transport group nationwide.
Kun sa diin sila ang wala nagbyahe kag ginparada ang ila nga mga tricycle sa atubang sang Barangay Hall.
Nagalaom si Malacad nga bangod sa silent protest, sila ang atubangon ni Punong Barangay Febe Legazpi, apang wala gid sang bisan isa nga Barangay Official nga nag-atubang sa ila kahapon.
Ang problema ang nag-ugat bangod sa gina-alegar nagadangat na sa 700 nga mga tricycle kag ebike drivers sa Barangay Handumanan.
Ang Handumanan TODA ang may-ara lamang sang masobra 300 ka miyembro, samtang masobra 500 naman ang yara sa record sang Barangay, apang may masobra 200 pa nga wala sang prangkisa, kasubong man wala nakalista sa record sang Barangay.
Suno kay Malacad, sadto P50 lamang ang ginasukot sa ila para sa business clearance, apang sang tinalikdan sila ang ginsukot na sang P300.
Ini ang ginapahayag gamiton agud ibayad sa mga Barangay Tanod nga magaregulate sang mga tricycle, apang wala man sila sang nakita nga tikang gikan sa Barangay agud matapna ang pagbyahe sang mga indi rehistrado nga units.
Bwas sila ang natalana nga magdialogo alas-4:00 sa hapon sa gym sang Barangay Handumanan.
