Pilason ang isa ka hinablos matapos ginbuno sang iya senior citizen nga tiyo bangud sa indi paghangpanay tuhoy sa ila nga asosasyon sa tricycle, sa Giner Street, Barangay Robles, La Castellana pasado alas 12:00 sang udto kahapon, Abril 9.
Ang biktima ang ginkilala nga si alyas Jarnel, 37 anyos, tricycle driver samtang ang suspek amo si alyas Carlito, 65 anyos, tricycle driver lunsay mga residente sang Barangay Nato, banwa sang La Castellana.
Sa interview sang Bombo Radyo Bacolod kay Police Capt. Jose Michael Muniez, Deputy Chief of Police sang La Castellana Municipal Police Station, nagainom sang makahulubog nga ilimnon si Jarnel sang nag-abot ang iya tiyo nga si Carlito sa ilimnan kag ginkomprontar ang iya hinablos.
Ginbuno sang tiyo ang iya hinablos sa nawala nga paa kag sa iban nga bahin sang iya lawas.
Gilayon man nga nagpalagyo ang suspek samtang gindala naman sa ospital ang biktima kag suno kay Muniez, yara na sa stable nga kondisyon si Jarnel.
Nadakop naman ang suspek pinaagi sa hot pursuit operation kag nakahunong na subong sa La Castellana Municipal Police Station.
Sa karon, nagahulat pa ang kapulisan kun magapasaka sang kaso ang mga himata sang biktima.
